top of page

ᲤᲡᲘᲥᲝᲓᲠᲐᲛᲐ

ზოგჯერ ცხოვრებაში ისეთი საკითხების წინაშე ვდგებით, რომლებიც მნიშვნელოვან გადაწყვეტილებას მოითხოვს, თუმცა შინაგან სიცხადეს ვერ ვპოულობთ. შესაძლოა, ეს იყოს ახლად წარმოქმნილი გამოწვევა ან წლების განმავლობაში გადაუჭრელი საკითხი, რომელსაც კვლავ და კვლავ ვუბრუნდებით.


ხშირად ამ გაურკვევლობის მიღმა ჩვენი შინაგანი ნაწილების განსხვავებული სურვილები, შიშები და მოთხოვნილებები დგას.


ჩვენში ბევრი ასეთი განსხვავებული ნაწილი ცხოვრობს: ერთი წინსვლას ცდილობს, მეორე გვიცავს, მესამე აკონტროლებს, მეოთხე ბრაზობს, მეხუთე სიყვარულს ეძებს, მეექვსე კი თავისუფლებას.


ვირჯინია სატირის „ნაწილების წვეულება“ არის შემოქმედებითი, ფსიქოდრამული მეთოდი, რომელიც თამაშის, მოძრაობისა და როლური ურთიერთქმედების საშუალებით გვეხმარება ჩვენი შინაგანი მრავალფეროვნების გაცნობიერებასა და ინტეგრაციაში.


ამ პროცესში ჩვენი შინაგანი ნაწილები წარმოდგენილია როგორც სუბპიროვნებები — მაგალითად, შინაგანი კრიტიკოსი, მფარველი, ბავშვი, მეამბოხე, შემოქმედი ან მაკონტროლებელი.


თითოეულ მათგანს საკუთარი ისტორია, ემოციები, მოთხოვნილებები და თავდაცვითი ფუნქცია აქვს. ზოგჯერ ისინი ერთმანეთს ეწინააღმდეგებიან, რაც შინაგან კონფლიქტებსა და გადაწყვეტილების მიღების სირთულეებს წარმოშობს.


„ნაწილების წვეულების“ პროცესში მონაწილეები საკუთარ შინაგან ნაწილებს აცოცხლებენ როლური თამაშის, მოძრაობის, ჟესტების, დიალოგისა და სცენური იმპროვიზაციის საშუალებით.


ეს გვაძლევს შესაძლებლობას, განსხვავებული პერსპექტივიდან დავინახოთ საკუთარი შინაგანი სამყარო და აღმოვაჩინოთ ის რესურსებიც, რომლებიც აქამდე შეუმჩნეველი რჩებოდა.


მეთოდის ძირითადი მიზნებია:

  • შინაგანი კონფლიქტების გაცნობიერება და ტრანსფორმაცია

  • საკუთარი განსხვავებული ნაწილების მიღება და ინტეგრაცია

  • შინაგანი წინააღმდეგობების მიღმა არსებული მოთხოვნილებების აღმოჩენა

  • გადაწყვეტილების მიღებისას მეტი სიცხადისა და თავისუფლების მოპოვება

  • საკუთარი თავის მიმართ ემპათიისა და მიმღებლობის განვითარება

  • შინაგანი ერთიანობისა და ჰარმონიის განცდის გაძლიერება


ამ პროცესის მთავარი იდეაა, რომ ჩვენი რომელიმე ნაწილის დამარცხება ან უარყოფა კი არ გვჭირდება, არამედ მისი მოსმენა, აღიარება და დანარჩენ ნაწილებთან ურთიერთშეთანხმება.


ეს არის შემოქმედებითი, ცოცხალი და ხშირად მოულოდნელი აღმოჩენებით სავსე პროცესი, რომელიც ხელს უწყობს საკუთარი თავის უფრო ღრმა გაცნობიერებას.


მნიშვნელოვანი ინფორმაცია მონაწილეებისთვის:

„ნაწილების წვეულებისთვის“ თითოეულმა მონაწილემ სახლიდან უნდა მოიტანოს სხვადასხვა საკარნავალო აქსესუარი: ნიღბები, ქუდები, შარფები, ჯოხები, მოსასხამები ან ნებისმიერი სხვა ნივთი, რომელიც როლების განსახიერებაში დაგვეხმარება.


რაც უფრო მრავალფეროვანი და შემოქმედებითი იქნება ეს ნივთები, მით უფრო საინტერესო და ცოცხალი გახდება ჩვენი „ნაწილების წვეულება“!

Bildschirmfoto 2024-03-04 um 20.13.58.png
ᲝᲠᲒᲐᲜᲘᲖᲐᲢᲝᲠᲘ:

ანო გაბიჩვაძე

bottom of page